Der projekt, u’pfònk bail en de Tiroler Presidenz ont iaz za meing prauchen en gònze lònt van Euregio. S ist an ring ver za learnen gamòcht va 10 interaktiv ont tematische trittn iber en Euregio (gschicht, eartkennen, musik, kultur ont sprochen): zan leistn van ring, de schualer meing toalnemmen en an konkurs pet en mòchen an poster as, en an kreativen vurm, de idea va Euregio paschraip. Abia prais s hòt en gònzn 5.000 euro. En mol 2021-2022 s hom toalganommen 53 klassn van drai lender, va de earsteschualont finz va de zboateschual. De poster as gabungen hom sai’ af de 7 van prochet kan MUSE-Museo delle Scienze va Trea’t praist kemmen, ont s hom toalganommen autoritetn ont auskennlait. En event hom toalganommen 190 schualer zòmm pet de sai’na learer. Kirzlech hòt se gahòltn an trèff pet de òrbetgruppe ver za plan s mol van konkurs van schualjor 2022/23 ont ver za studiarn de virm ver za baitern de schualòrbet va de sait.