Sechen de lander van Euregio ont roasn umansist as de koriare ont as de zich van Tirol, Sűdtirol ont Trentin: de sèlln as schoa’ hom de jor oder secks mu’net tauerkòrt ver de òllgamoa’meivernsemittln oder de Euregio Family Pass as de 17 van leistagest 2022, bail der To van meivern se Euregio barn se meing umansist gea’ bavai s ist de Europeische boch van meivern se.
Der trèff kimmp gamòcht zboa vert as jor ober haier hòts schea’na naiekaitn: men mu roasn umansist turch de gònze europeische region, va Kufstein finz ka Borghetto, ver de sèlln as schoa’ hom de tauerkòrt oder de Euregio Family pass barn meing en vil museum va de provinz va Trea’t ont Poazn ont van Tirol umansist gea’. Ver òlla de lait barn kemmen augatu’ de tirn van Euregio nochrichtn ont zòmmòrbetn sitzn va Trea’t, Poazn ont Innsbruck. Men bart meing de suach mòchen zòmm pet de toalnemmer van team Euregio va um 10.00 en de vria finz um 13.00 nomitto van glaiche to. Ver en Trentin, Casa Moggioli, sitz van Euregio ka Trea’t, bart bòrtn groasa ont kloa’na pet an bichtegen programm va untersuach, vederbail der Muse ont de trentinische schlossen barn umansist sai’: Castello del Buonconsiglio, Castel Stenico, Castel Beseno, Castel Thun ont Castel Caldes. Ver de autonome Provinz va Poazn hom toalganommen der archeologische Museum van Sűdtirol, der Museum va bischenschòft van Sűdtirol ont ont der Museum Eccel Kreuzer (lai de ausònder austell); ver en Land Tirol der Ferdinandeum, der Volkskunstmuseum, de Hofkirche, der Zeughaus, der Tirol Panorama mit Kaiserjägermuseum.