Schiar 60 djunge boda zuarkhemmen vo alln drai in lentar von Euregio Tiról-Südtiról-Trentino nemmen toal in EuregioSummerCamp 2022 boda haür bartze haltn atz San Valentìn pinn spruch “Natùr trèfft Kultùr”. Di boch arbatn boda bart auhöarn atz 14 von snitt hatt ågeheft atz 7 von snitt pittnar khurtzan innvüar in tages.
Vor in Vorsitzar von Euregio un vodar autonome Provìntz vo Tria, iz eppaz boda geat inkeng dar bölle von organ zo geba hèrta mearar okasiongen in djungen zo khenna pezzar bazta mage opfarn dar Euregio un vorstìan sèlbart bia ma mage arbatn pittnåndar übar di grentzan. Vor in djeneràl sekretardjo von GECT Tiról-Südtiról-Trentino, Marilena Defrancesco: “Dar Summer Camp iz an åndra okasiong zo macha bokhennen di djungen von drai lentar un gemen zuar zo maga khemmen tschelle, un gian übar di sachandar boda haltn bait azpe di zung, un darzuar khennen pezzar di stordja un di khennzaichan vo haüt von drai lentar”. In da naturàl kornìs vodar Hoachebene vo Brentonico, dar Camp vüart vür di mittarbat zbisnen in djungen von Euregio, machantese starch von spruch vodar trentinar vorsitzarung vor di djar 2021-2023: dar Euregio iz djung.