De Tolgamoa’schòft Hoa Valzegu’ ont Bersntol hòt garo ausgaleik zboa bandi ver za gem an prais en de studentn ver en jor 2020- 2021. De bandi sai‘ tsbunnen ver de studentn as lem en a gamoa‘ va de Tolgamoa’schòft Hoa Valzegu‘ ont Bersntol as sai‘: Altopiano della Vigolana, Baselga, Bedollo, Calceranica, Caldonazzo, Zifzen, Vlarotz, Garait, Fornace, Leive, Palai, Persn, Schandurschl, Tenna, Valzurg-Valisn.
Sechber de doin zboa prais. Der earste ist tsbunnen ver za gem zaruck en de studentn va de hoa’- ont va de òrbetschual a toal van sèll as se spendiarn ver de schual.
De kostn as kemmen garèchnt sai’: kostn ver za schraim se inn en de schual, kostn van zins ont ver en èssn, kostn ver de koriara ont ver za kaven de piacher. De kritern as men praucht ver za gem de prais sai‘: de media van student, der stònt va de familia ont de kostn. Ver za meing toalnemmen, de studentn miasn lem en a Gamoa’ va de Tolgamoa’schòft Hoa Valzegu’ ont Bersntol, hom finz as 20 jor, inntschrim sai’ ver en earste vòrt en de sèll klasse ont hom an rèchten D Icef.
No de regln keing en Covid, de enteressiaretn meing se oa’ne leing pet de u’stelltn van omtn abia as se meing ogem de vrog. Òlla de kostn as kemmen trong van student miasn dokumentnart sai‘ ont men mias derzualeing der Icef.
Der ònder bando ist an prais as kimmp gem en de studentn as hom nèt de koriara za gea‘ za schual ont meing en sèll miasn prauchen òndra mittln (der auto, an pulmin as se zoln se sèlber ont asou envire).
Ver za gem aus der prais geat men vort va zboa kilometre vèrr va de schual oder van leistn plòtz bou as men aribart pet de koriara va, envire. De earstn zboa kilometre kemmen nia garèchnt en prais.
Òndra kritern sai’: lem en a Gamoa’ va de Tolgamoa’schòft Hoa Valzegu’ ont Bersntol, hom finz as 20 jor, inntschrim sai’ ver en earste vòrt en de sèll klasse ont drinn stea’ en Icef.
De zuazol kimmp gem en de sèlln as gea’ pet en sai’ auto ont en de sèlln as zoln se sèlber an pulmin.
Men schauk òlbe der Icef va de familia, de kilometre as men mòcht pet en auto ont der numer van roasn.
Ver za nemmen toal en de zboa bandi, de familie oder de studentn miasn ogem de vrog vou de 4 van schanmikeal um zeichena de vria.
Abia as ber hom schoa‘ tsòck, men mias u’riaven de omtn ont tea‘ se u’mèln. De omtn lònen inn de enteressiaretn za bòrtn nèt der leiste to za gem o de vrog.
Ver òndra informazionen mu men u’riaven de Tolgamoa’schòft asn numer 0461/519503.

Lorenza Groff